Көпшілікке әйел азабы мен тағдыры жайлы жазылған «Тауқымет» романы арқылы жақсы таныс жазушы, Қазақстан Республикасы Президенті жанындағы әйелдер және демографиялық саясат кеңесінің мүшесі, асырауында балалары бар мүгедек аналардың республикалық «Бибі-Ана» қоғамының Президенті Бибігүл Иманғазина жуырда Шымкент қаласында болып, республикалық қоғамның Оңтүстік Қазақстан облыстық бөлімшесінің конференциясына қатысты.

Облыс бойынша 4 мыңға жуық мүгедек аналар бар болса, олардың әрқайсысында кем дегенде 1-2 баладан бар.

Яғни, қаншама тауқыметке толы тағдырлар десеңізші.

Ал облыстық қоғамның төрайымы Г.Андасова, Бибігүл Иманғазинаның айтуынша, тек өзінің жағдайын күйттеп, өзінің ұл-қызын жоғары оқу орнына түсірген соң, өзге мүгедек аналармен шаруасы болмаған.

«Бибі-Ана» қоғамының мақсаты мүгедек аналардың ұл-қыздарына білім беру, жоғары білім алуына мұрындық болу, мүгедек ана мен баланың денсаулығын түзеуіне көмектесу болып отыр.

Міне, осы мақсат-мүддені іске асыра алмаған Р.Андосованың орнына бұл күнгі конференцияда жаңадан төрайым сайланды. Сонымен «Бибі-Ана» қоғамының облыстық бөлімшесінің төрайымы болып Ханшайым Дәулетова сайланды.

20 наурыз, 1998 ж.

Ж.МАМЫРӘЛІ.